मांया ख्वा: स्वयेगु न्हि

मांया ख्वा: स्वयेगु न्हिया लसताय्
पासा पुच: गुथि युकेया पाखें गुपू चिनाख:

|| १ ||

“अनन्त गुणं जाम्ह मां छ, द्य या नं द्य खः छ।
थःगु दुक्ख या वास्ता मयासे, मस्तय् च्यूता तईम्ह छ।
करुणाया सागर छ मां, छंगु गुण लोमन्के फई मखु जिं।
भवसागरय् च्वं तले यःमां, छं हे पुता जुई दयेमाः जि॥”

– अमृत रत्न स्थापित,
पलिस्थामि व न्हापाम्ह नाय:, पासा पुच: गुथि युके


 

|| २ ||

“मां! जित: जन्म बिया
छाय् ज छं त्वतावना?
जिगु नुगलय् छंगु हे हि दु
छंगु मतिनाया हे किपा ख: जि।

अथे नं छु याये? छ मदया
पला: पतिंध्यय्‌ध्यय् चू जि।
ख्व:सा ख्वबि हुइपिं मदु,
हर्षय् न्हिलिपिं नं मदु,
मां! छ मदया
जि जुयेमाल उखेला: थुखेला:।

निभा: त्वसां ख्यूँसे च्वंथें!
जि फसय् ब्वोगु धू थें,
अझ निगू च्व: निखे ज्वना
सालात:गु खिप: थें!

तर मां!
छंगु शक्ति जिके दु खनि
निगू च्व: नं साला:
थ:गु हे ल्हातय् तयेगु
अले न्ह्यज्याना वनेगु।”

– हिन्द मैँया वैद्य
दुज:, पासा पुच: गुथि युके


 

|| ३ ||

“हिनू पतिकं मां दयानं ख्वा: स्वयेगु दिं थौं
उखें स्वये थुखें स्वये, न्ह्याथासं खने मां मां

खनाच्वंगु दु मां मां, नुगलय् सनाच्वंगु दु मां
लुयाच्वंगु दु मां मां, हिनूपतिं न्ह्यानाच्वंगु दु मां

सुथंसिया चिरि चिरि सलय्, अय्‌नं निफूति ख्वबि हा:गु
मचायेकं मांया हुसां बंय् लाइभन फया दिइगु

जन्म लिपा मृत्यु खयानं गुलि माया मोह मतिना
थ्व संसारया लिला धात्थें गुलि अपरम्पार य मां”

– ज्ञानी शोभा तुलाधर नेवा:
दुज:, पासा पुच: गुथि युके


 

|| ४ ||

“संसार न्यंगु कोरनाया ग्यानापुगु कहर
न्ह्यागु हे वसां आपत बिपतया लहर
जितः जि जुया म्वायेगु स्यना वंम्ह
काचाक्क लुमनिगु व हे मां छम्ह

द्योसां दंसां न्ह्याबलें न्ह्याथाय् च्वंसां
लुफिं जक हाःसां धाये वइगु आयामां
दुःख कष्टया सागरय् धलं ब्वासां
मचायेक जिगु म्हुतु पिहां वइगु योमां

छ सु गनं वयाम्ह धकाः सुनानं न्यंसां
कनेमाः झीसं सदां थःगु मां देया नां
अपुक  ल्हाये दुगु झीगु मां भाय्
झीसं लुमंका तयेमाः सदां सदां”

– श्रीलक्ष्मी श्रेष्ठ
दुज:, पासा पुच: गुथि युके

(चिनाख:मि मय्‌जु मय्‌जु थौंकन्हे नेदरल्याण्डय् जुयादी)


 

|| ५ ||

“झी मांपिं;
झीगु दु:ख-सुखया न्ह्याबलय् च्यूता तइपिं
न्ह्याबलय् न्ह्याथें जागु ईलय् नं ह:पा बीपिं
झीगु जीवनय् न्हिसुया धिसिला:गु छगु थां
मांया ख्वा: स्वयेगुया भिंतुना!”

– लसता तुलाधर
दुज:, पासा पुच: गुथि युके


 

|| ६ ||

“करूणां भय् भय् लुया करूणामय द्यया लु बिइम्ह
मतिनाया अन्नं पूर्ण जुया अन्नपूर्ण द्यया लु बिइम्ह
दुनुग:या स्यागु घा: लंका तारा द्यया लु बिइम्ह
म्हुतुइ न्ह्याबलय् सुवा जक: दया ससुद्यया लु बिइम्ह

हलिमय् च्वंपिं सकल माँपिंत मातातिर्थ औंसी (चौलागा: आमै)या यक्व यक्व भिंतुना!”

– प्रनिशा शाक्य
तजिलजि छ्याञ्जे, पासा पुच: गुथि युके लण्डन


 

|| ७ ||

“मां छ गुलि अद्भुत, गुलि नायु छ उलि हे बल्ला:
जिमित: याना थ:गु नुग:, मतिना क्यं छं थी थी जलं

लं छं क्यनाच्वन न्ह्याबलय् जित:, धैर्य क्यं छं जि मुर्ख जूसां
छं याये मफूगु छुं हे मदु थन, जु फुक्क: बिषयलय् छ बिज्ञ नं

न्ह्याक्व तापासां छ नुगलय् हे, नुगलय् बास स्वर्ग खना
छन्त जिगु मतिना, दु यक्व हनाबना
ल्यये हे मासां – मां जित: थुगु लोकय् छ हे छम्ह जक:”

– ओजेश सिंह
पासा पुच: गुथि युकेया ट्रष्टीपिनिगु बोर्डया नाय:


 

|| ८ ||

“मां जिगु मां
जिंगु नितिं जिं मिखां खंम्ह

साक्षात् द्य छपिं हे ख: मां
हलिं स्वये दत:, धरती पलां तयेदत:
शायद स्वये मदइगु जुइ मां नं जन्म मब्यूगु जूसा।
सुथं, न्हि, चा:
थाकु, अ:पु छु हे फूमचासें
ब्चलंकाबिया दिल जित: मां।
करूणा व सुवा नं बिलिबिलि जाम्ह जिमि मां
निस्वार्थ भावना पलापतिं तिब: बियाच्वनिम्ह जिमि मां
त:धंगु चिधंगु दु:ख छु हे वसां समाधान यानाबिम्ह मां
छपिं हे ख: जिगि नितिं साहस बीम्ह मां
ससुद्य, लक्ष्मी, भगवती, करूणामय, काली
३३ कोटी द्य जिगु नितिं छपिं हे ख: मां।
गथे याना जि छिगु गुण पुलेगु मां?
थौंया मातातिर्थ औंसीया न्हि सकल मांपितं जिगु दुनुगलंनिसें यक्व यक्व भिंतुना देछानाच्वना!”
– रूक्मणी मानन्धर

न्वकु, पासा पुच: गुथि युके लण्डन


 

|| ९ ||

“मां जि योम्ह मां!

छ थयाम्ह हलिमय् सु हे मदु मां
छ हे ख: जित: दकलय् न्हापा खं स्यनिम्ह
छ हे ख: जित: दकलय् न्हापा दने स्यनिम्ह
छ हे ख: जित: दकलय् न्हापा ल्हा ज्वना न्यासेवने स्यनिम्ह
छ हे जिमि दकलय् न्हापाम्ह गुरू व गुरूमां।
मां जि योम्ह मां!
छ थयाम्ह हलिमय् सु हे मदु मां
छंगु ममताया सागर अपरम्पार थुगु हलिमय्
छन्त हे जि लुमंकाच्वना न्ह्याबलय् थुगु हलिमय्
यक्व यक्व सुभाय् छित:, मां जि योम्ह मां!”
– रमणी मानन्धर
दुज:, पासा पुच: गुथि युके

(चिनाख:मि मय्‌जु थौंकन्हे स्कटल्याण्डय् जुयादी)