जि छगू चासु
आर. मानन्धर
 
जिगु जन्हुफातय् चासुयाच्वंगु दु । जि दन्त्यकथाया पात्रत थें न्हापां न्हिले, अनं ख्वये । न्हिले, छाय्धाःसा थ्व चासुयाच्वंगु्ली हे जिं थः दुगु वाःचायेका च्वना । मखुसा जिगु अस्तित्वया पत्याः याये बहःगु दसि हे मेगु छु दु - चासु वयाच्वंगु आधारय् हे जिं थुइकाच्वना - जि दनि , जि मसीनि । चासुं जितः भलसा बियाच्वन । जिं "जि" धइच्वने दुगु हे चासुं खः । तर आःतक जिं मस्यूनि कि जि चासु हे खः कि चासुवयाच्वंगु थाय् , कि चासुया च्वंगु वाःचायेका च्वंम्हृ जकं । तर न्हृयाग्गु थज्वीब्यु , जिं निर्धक्क जुयाः धायेफु कि जि दु , छाय्धाःसा जितः चासु वयाच्वंगु दु । थथे बिचाः याये बलय् जिगु म्हृुतुसि मुसुकाइ ।
तर अबलय् हे जितः ख्वये मास्ते वयाच्वंगु नं दइ । छाय्धाःसा जिं थःगु ल्हाः म्वय्थ्यानाः जन्हुफातय् तक चासुवये मफु । जिं थःगु हे ल्हातं तापाः । जिं जितः हे न्यंकभनं थी मफु । जिगु मनय् लुइ , शायद जि धैम्ह तसकं विशाल ज्वी - जिगु ल्हातं न्हृयायेमदयेक । अबलय् जितः ताइ , जि छगू सागर खः - छकूचा सि थःगु पिनेलाःम्ह । सियात थीगु कुतलय् व थःके हे छ्वावानाच्वनी । व न्हृयाबलें अशान्त जुयाः दासिवयाच्वनी । तर नं व गबलें अनतक थ्यंके फइमखु । गबलें बिचाः वइ , जि तसकं सीमित नं ज्वीफु , थःगु ल्हाः तकं म्वय्थ्याये मजीक कय्कुंगु सीमा दुने लिकुना च्वंम्ह । अले जितः च्वनी , गनं जि सिसि दुने कैद जिन्न जकं मखुला , प्यखें खाःया आवरणं कुंकाः थःत थीत ल्हाः म्वयेद्याके मछिंक च्वंच्वनेमाःम्ह । अथेला सागर धायेगु व सागरया तःलय् सिसिदुने च्वंम्ह जिन्न धायेगु नितां छता हे खः । थः बारे अस्पष्ट कल्पना यायेबलय् काः वनेगु प्रतीकया खँ जक खः ।
थथे अनेअने कल्पना यायेगु, मनय् खँ वायेकेगु नं छगू चासु वयेगु कुतलय् ल्हाः म्वय्थ्यायेगु तरीका खः, चासु वयेगु तरीका खः , तर पाय्छि थाय् मखु ।
थुकथं-थुकथं हे चासु वयेगु कुतलय् तःकथं ल्हाः म्वयेथ्यायेगु जुइ । तर व ल्हाः गबलें जिराफया गःपःथें ताःहाकः जुयामवः । उकिं व गबलें अनतक मथ्यं गन धाथें चासु म्वयाच्वंगु दु । अय्सां ल्हाःतं चासुम्वः वनी , अन गन कि चासुवैच्वंगु हे मदु । जिं अन चासु वयेगुया अर्थ छु खःजिं मस्यू । तर नं जिं चासु वै । शायद ही-महीयात अभिव्यक्त यायेगु छगू पहः ज्वीफु । शायद थःत थःम्हं झंगः लायेगु कुतः नं ज्वीफु । जिं बलंबलं ल्हाः म्वय्थ्यानाः चासुम्वइच्वंगु परिधीं पिने चासुवये , गुगु थासय्तक जिगु ल्हाःतं न्हृयाये दयेके फु ।
तर चासु वःलिसे बुलुहुं बुलुहुं अन नं चासुवै गन धाथें चासुवैच्वंगु मदु । अले चासुवयांतुं च्वनेमाली । अन चासु वयेगुली हे न्हृयइपुया वइ । तर अबलय् नं जिं सियाच्वनी कि व धाथें चासुवैच्वं थाय् मखु । अबलय् नं धाथें चासुवः थाय्या चासुया अनुभव जुयाच्वनी । जिं सियाच्वनी कि निन्हुप्यन्हु चासु मवल धाःसा अन चासु वइ मखु । शायद थ्व जिगु निम्ति अभिशाप ज्वी फु , जिगु दर्ुभाग्य ज्वीफु । छाय् धाःसा गुलिखे मनूतसें मखुथाय् चासु ववं हे धाथें चासुवः थाय् ल्वःमंका छ्वइ । जिं अथे याये मफु । धाये , जितः अथे मजू ।
थबलय् नं जितः छक्वः न्हिले मास्ते वइ , छक्वः ख्वये । न्हिले, छाय् धाःसा थ्व हे ला जुलनि जिगु चेतनाया दकलय् स्याचुगु दसि । जि मेपिं थें मजुया । जितः धाथें चासुवः थाय्या बोध दु । शायद जि धैम्ह धाथें हे दु । ख्वये , छाय् धाःसा बोधया बावजूद नं जिं म्वाः थाय् चासुवयेगु अथें त्वःते फइमखु । जिं थःत ध्वंलानाच्वनागु वाःचाइ । मेगु पीडाया जन्म जुइ । थ्व पीडाय् जितः ख्वये मास्ते वइ । तर गनं - गनं आत्मसन्तुष्टीया अनुभव नं जुयाच्वनी । छाय् धाःसा जि मदुसा जितः थजोगु जटील पीडा हे गुकथं जुइ - थुकिं जिगु अस्तित्वयात झन बांलाक प्रमाणित याइ ।
जिं बरोबर तःकथं थःगु अस्तित्वया प्रमाण मुंके । शायद जितः थ्व म्वानाच्वनागु फतिं फक्व अप्वः अनुभव याये मास्ते वः।शायद जि जिगु हे निम्ति स्वयं सिध्द मखु । शायद थथे मयात कि जि दु धैगु नं ल्वमनावनेफु ।
शायद .................
या त थ्व जिगु अस्तित्वगत चासु खः , या थ्व जिगु अस्तित्व प्रमाणित यायेगु चासु खः ।